၂၀၁၀ ခုနှစ်တွင် ပြုလုပ်မည့် နအဖ စစ်အစိုးရ၏ ရွှေးကောက်ပွဲနှင့် ပတ်သက်ပြီး အမြင်အမျိုးအမျိုး ထွက်ပေါ်နေချိန်တွင် ၂၀၀၇ ခုနှစ်ရွှေဝါရောင်တော်လှန်ရေးမှ မွေးဖွားပေးလိုက်သော သာ့သနာဦးသျှောင် အပြည်ပြည်ဆိုင်ရာ မြန်မာ ရဟန်းတော်များ အဖွဲ့ချုပ်မှ ရွှေးကောက်ပွဲတွင် ပါတီပေါင်းစုံကို ပါဝင် ယှဉ်ပြိုင်ခွင့် ပြုရန် နအဖ စစ်အစိုးရကို မေတ္တာရပ်ခံလိုက်သည်။
အဆိုပါ မေတ္တာရပ်ခံစာကို ၂၀၀၉ ခုနှစ် ဒီဇင်္ဘာလ ၄ ရက်နေ့တွင် အမေရိကန် နိုင်ငံ နယူးယောက်မြို့တွင် ပြုလုပ်သော အပြည်ပြည်ဆိုင်ရာ ရဟန်းတော်များ အဖွဲ့ချုပ် ဒုတိယမြှောက် သံဃာ့ညီလာခံတွင် ထုတ်ပြန်လိုက်ခြင်း ဖြစ်သည်။
အဆိုပါ မေတ္တာရပ်ခံစာကို အဖွဲ့ ဥက္ကဌ ဖြစ်သူ ပီနန်ဆရာတော် ဦးပညာဝံက လက်မှတ်ရေးထိုး ထုတ်ပြန်ခဲ့သည်။
အဆိုပါ မေတ္တာရပ်ခံစာထဲတွင် နအဖ စစ်အစိုးရမှ ထုတ်ပြန်ကျေညာထားသည့် ၂၀၁၀ ခုနှစ်ရွှေးကောက်ပွဲသည် ပြည်ထောင်စု တိုင်းရင်းသူ တိုင်းရင်းသားတို့ ဖွဲ့စည်းထားသော ပါတီပေါင်းစုံ ယှဉ်ပြိုင်ခွင့် ရှိမှသာလျှင် ပြည်သူတို့ လိုအင် ဆန္ဒနှင့် ကိုက်ညီ၍ မှန်ကန် မျှတသော ပြည်သူ့ ရွှေးကောက်ပွဲဟု ခေါ်ဆိုနိုင်မည်ဖြစ်ကြောင်း ဖေါ်ပြသည်။
၎င်းအပြင် ဤကဲ့သို့ ရွှေးကောက်ပွဲမျိုးမှ သာလျှင် ပြည်သူများ သာယာဝပြောစွာ နေထိုင်ရ၍ မိမိတို့၏ အသက် စည်းစိမ် အိုးအိမ်တို့အတွက် အာမခံချက် ရရှိမည်။ ကမ္ဘာ့နိူင်ငံများနှင့် တန်းတူညီမျှ လူမူရေး၊ စီးပွားရေး၊ ပညာရေး၊ ကျန်းမာရေး စသည့် နိုင်ငံတော်၏ လိုအပ်ချက်များကို မြှင့်တင်ပေးနိုင်လိမ့်မည်။ ယနေ့အိမ်နီးချင်းနိုင်ငံများ ဖွံ့ဖြိုးတိုးတက်နေသလို မြန်မာနိုင်ငံတော်အတွက် အလားတူ ကြိုးပမ်း လုပ်ဆောင်နိင်ခွင့် ရရှိမည်ဟုဖေါ်ပြသည်။
ဤသို့သော ရွှေးကောက်ပွဲကြီးကသာ ကမ္ဘာကြီး၏ လျှင်မြန်စွာ ပြောင်းလဲနေမူကို အမှီလိုက်နိုင်အောင် ကြိုးပမ်းနိုင်မည် ဖြစ်ပြီး နိုင်ငံတကာမှလည်း အသိအမှတ်ပြု လေးစားလာမည်ဟု မမှိတ်မသုံ ယုံကြည်သဖြင့် ပြည်သူတို့၏ ထာဝစဉ် အေးချမ်းမူကို ရှေ့ရှု၍ ၂၀၁၀ ခုနှစ်တွင် ကျင်းပပြုလုပ်မည့် ရွှေးကောက်ပွဲကို ပါတီပေါင်းစုံ ပါဝင် ယှဉ်ပြိုင်ခွင့်ရသည့် ရွှေးကောက်ပွဲမျိုး ဖြစ်လာရေး အတွက် မပျက်မကွက်ဆောင်ရွက်ရန် နဖအ စစ်အစိုးရကို လေးနက်စွာ မေတ္တာရပ်ခံ တိုက်တွန်းကြောင်း ဖေါ်ပြထားသည်။
၂၀၁၀ ခုနှစ်ရွှေးကောက်ပွဲအား နအဖ စစ်အစိုးရမှ မဖြစ်မနေ ကျင်းပသွားရန် အတိအလင်း ကျေညာထားပြီ ဖြစ်သော်လည်း ရွှေးကောက်ပွဲဆိုင်ရာ ဥပဒေနှင့် ကျင်းပမည့် နေ့ရက်ကို နအဖ စစ်အစိုးရမှ တရားဝင် ထုတ်ပြန်ကျေညာခြင်း မရှိသေးချိန်တွင် နအဖ စစ်အစိုးရအား အပြည်ပြည်ဆိုင်ရာ ရဟန်းတော်များ အဖွဲ့ချုပ်၏ မေတ္တာရပ်ခံစာ ထွက်ပေါ်လာခြင်း ဖြစ်သည်။
http://www.narinjara.com/detailsbur.asp?id=2191
Subscribe to:
Post Comments (Atom)
No comments:
Post a Comment