ဂီရိသင့် ချင်းရွာ ၁၀၀ ကျော် ရိက္ခာခက်ခဲ

ဆလိုင်းထွန်း | သောကြာနေ့၊ ဒီဇင်ဘာလ ၀၃ ရက် ၂၀၁၀ ခုနှစ် ၂၁ နာရီ ၂၁ မိနစ်

နယူးဒေလီ (မဇ္ဈိမ) ။ ။ ဂီရိမုန်တိုင်း သင့်ခဲ့သည့် ချင်းပြည်နယ်တောင်ပိုင်း မြို့နယ် ၄ မြို့နယ်အတွင်း ရွာ ၁၀၀ ကျော်ရှိ ဒေသခံ တသောင်းကျော်မှာ စားနပ်ရိက္ခာ ခက်ခဲနေကြောင်း ဒေသတွင်းရှိ ပါတီအဖွဲ့အစည်းများ အဆိုအရ သိရသည်။

ရခိုင်ပြည်နယ်တွင် လူဦးရေ တသိန်းကျော် အိုးအိမ်မဲ့ဖြစ်ခဲ့သော အောက်တိုဘာလ ၂၂ ရက်နေ့တွင် တိုက်ခတ်သည့် ဂီရိမုန်တိုင်းကြောင့် ချင်းပြည်နယ်ရှိ မင်းတပ်၊ ပလက်ဝ၊ မတူပီနှင့် ကန်ပက်လက် မြို့နယ်များ၌ပါ ကျေးရွာ ၁၀၀ ကျော်တွင် ဆန်၊ ပြောင်းဖူး၊ ပဲနှင့် သီးနှံစိုက်ခင်းများ ပျက်စီးခဲ့ပြီး ဒေသခံများ ရိက္ခာ ပြတ်လပ်နေခြင်း ဖြစ်သည်။

“စားစရာ ဆန်၊ ပြောင်း လုံးဝ မရှိတော့တာ တပတ်လောက်ရှိပြီ။ တောမှာ သစ်သီးတွေ ရှာစားတယ်။ တောကြက်၊ ငှက်၊ ကြွက်၊ ငါး စတဲ့ အကောင်တွေကို ဖမ်းစားတယ်။ ဒူးလေး၊ လေးနဲ့ မျှား၊ လောက်လေးဂွ၊ ဓား၊ လှံ စတဲ့ လက်နက်ကိရိယာနဲ့ ဖမ်းရတာပါ။ ဒါပေမဲ့ မိသားစုများတော့ လုံလောက်အောင် မရနိုင်ဘူး” ဟု မတူပီမြို့နယ် ကာအိမ်းရွာ ဒေသခံတဦးက ပြောသည်။

ရန်ကုန်အခြေစိုက် မြန်မာနိုင်ငံ ကျေးလက်ဒေသ ဖွံ့ဖြိုးရေး အေဂျင်စီ CAD မှ ညွှန်ကြားရေးမှူး ဦးဂျိုးဇက် ဝင်းလှိုင်ဦးက “စားစရာ မရှိရင် အိမ်မွေးတိရစ္ဆာန် ရောင်းပြီးတော့ အစားအစာ ဝယ်စားရတာပေါ့နော်။ စားစရာမရှိလို့ တောမှာသွား၊ သစ်သီး၊ သစ်မြစ်တွေစားနဲ့ နေကြတယ်လို့ ပြောတယ်။ တချို့ဆိုရင် ရွာတောင် စွန့်ခွါတဲ့သူ ရှိတယ်။ အဲဒီရွာမှာ မနေကြတော့ဘူး” ဟု မဇ္စျိမကို ပြောသည်။

CAD က ရက်ပေါင်း ၂၀ ခန့်အတွင်း တောင်ပိုင်းဒေသမှ အိမ်ခြေ ၃၀၀ ခန့်ကို စစ်တမ်းကောက်ခဲ့ရာ ထိုအထဲမှ ၈၇ ရာခိုင်နှုန်းသည် နေအိမ်တွင် ရိက္ခာမရှိဘဲ၊ အဆိုးဆုံး ဧရိယာမှာ ကန်ပက်လက်မြို့နယ်ဖြစ်ကြောင်း တွေ့ရှိခဲ့ကြသည်။

“ဂီရိမုန်တိုင်း တိုက်လာတော့ တောင်ယာက လုံးလုံး ကျသွားတယ်။ မိုးရေ၊ တောင်ကျရေ၊ လေတွေကြောင့်ပေါ့နော်။ အခုတော့ စိုက်စရာ မျိုးလည်း မရှိတော့ဘူး။ ရှိရင်လည်း စိုက်ချိန်မတန် စိုက်ရင် အလကားပဲ” ဟု ကာအိမ်းရွာသားက ဆိုသည်။

လွန်ခဲ့တဲ့ တလလုံး ဒေသတွင်းသို့ လှည့်လည်သွားလာနေခဲ့သည့် ချင်းတိုးတက်ရေးပါတီ CPP အထွေထွေ အတွင်းရေးမှူး (၂) ဦးရှိန်းထွန်းက “ ရှိတဲ့ ဝက်၊ ငှက်၊ နွား၊ နွားနောက် စတဲ့ အိမ်မွေးအကောင်တွေကို ရောင်းပြီး စားရတာ။ ရောင်းစရာ မရှိတဲ့သူတော့ တောထဲထွက်ပြီး ဝမ်းစာရှာတာကို မြင်ရတာ တကယ့်ကို ရင်နင့်ပါတယ်။ တချို့တွေက အရင်တုန်းက အမဲသတ်ရင် အရေခွံတွေ လှမ်းတာ ရှိတယ်။ အဲဒါကို ရေလုံပြုပ်နဲ့ စားကြတယ်” ဟု ပြောသည်။

ရန်ကုန်ရှိ ချင်းတိုင်းရင်းသားများနှင့် ခရစ်ယာန် အသင်းတော်များက အလှူခံကာ မကြာသေးခင်က ဆန်အိတ် ၃ဝ ပို့ပေးခဲ့ကြောင်း CAD အဆိုအရ သိရသည်။

၎ မြို့နယ် မြို့ပေါ်၌ ပြီးခဲ့သည့် နိုဝင်ဘာလဆန်းတွင် ကျပ် ၂ သောင်း ၁ ထောင်ခန့်ဈေးရှိ ဆန်တအိတ်သည် ယခုအခါ ကျပ် ၃ သောင်းထိ ဈေးတက်နေသည်။

http://mizzimaburmese.com/news/inside-burma/6539-2010-12-03-14-56-32.html