ပြောခွင့်မရတဲ့ စကားသံ

ပြောခွင့်မရတဲ့ စကားသံ
ပြည်တွင်းဂျာနယ် အယ်ဒီတာတဦး အောက်တိုဘာ ၁၉၊ ၂၀၁၀ မိုးမခ

“---မဲမပေးဘဲ နေလို့ ဘာဥပဒေနဲ့မှ ဖမ်းလို့မရဘူး---”

ပြီးခဲ့တဲ့ ရက်ပိုင်းက ရထားလမ်းသစ် ဖွင့်ပွဲတခုမှာ ကြံ့ဖွတ်ပါတီ ဥက္ကဋ္ဌကြီးလည်းဖြစ်၊ လက်ရှိ နအဖအဖွဲ့ကြီးရဲ့ ဝန်ကြီးချုပ်လည်း ဖြစ်တဲ့ ဦးသိန်းစိန်က ၂ဝ၁ဝ နိုဝင်ဘာ (၇) ရက်ရွေးကောက်ပွဲဟာ တိုင်းပြည်အတွက် အလွန် အရေးကြီးတယ်၊ ရွေးကောက်ပွဲကို နှောက်ယှက် ဖျက်ဆီးတာမှန်သမျှ ထိရောက်စွာ အရေးယူမယ် ဆိုပြီး ပြောသွားပါတယ်။ တကယ်တမ်းက ၂ဝ၁ဝ ရွေးကောက်ပွဲဟာ တိုင်းပြည်အတွက် ပိုပြီးတိတိကျကျပြောရရင် မြန်မာနိုင်ငံသူ နိုင်ငံသားတွေအတွက် ဘာမှ အရေးပါတဲ့ ပြောင်းလဲမှု မဟုတ်ပါဘူး။

နအဖအတွက်ကတော့ အရေးကြီးတယ် ဆိုတာ ဟုတ်ပါလိမ့်မယ်။ ၂ဝ၁ဝ ရွေးကောက်ပွဲမှာ နအဖအတွက် အလွန် အဖိုးတန်တဲ့ အကျိူးအမြတ် နှစ်ခု ရပါလိမ့်မယ်၊ တခုကတော့ မတရား တဖက်သတ် ရေးဆွဲထားတဲ့ ၂ဝဝ၈ ဖွဲ့စည်းပုံကို အာဏာသက်ဝင်စေဖို့နဲ့ နောက်တခုကတော့ သူတို့ကိုယ်သူတို့ တရားမဝင် အာဏာသိမ်းအစိုးရ အဖြစ်ကနေ တရားဝင်ရွေးကောက်ပွဲနဲ့ တက်လာတဲ့ အစိုးရအဖြစ် ပုံသဏ္ဌာန် ပြောင်းလဲဖို့ ဖြစ်ပါတယ်။

ကျနော့်အနေနဲ့ကတော့ ၂ဝဝ၈ ဆန္ဒခံယူပွဲကို လက်မခံနိုင်ခဲ့သလို ၂ဝ၁ဝ ရွေးကောက်ပွဲဟာ ဒီမိုကရေစီအခွင့်အရေး၊ လူ့အခွင့်ရေးတွေကို အာမခံပေးနိုင်လိမ့်မည်လို့လည်း မယုံကြည်နိုင်ပါဘူး။ လက်လည်း မခံနိုင်ပါဘူး၊ ဖြစ်စဉ်တွေအားလုံးက တဖက်သတ် အတင်းအကြပ် ပုံစံချထားတာမျိုး ဖြစ်နေတာကြောင့်ပါ၊ အတင်းအကြပ် မဲပေးခိုင်းခြင်းသည် ဥပဒေကို ချိုးဖောက်ခြင်း ဖြစ်သည် ဆိုတာကို ထောက်ခံပါတယ်၊ လူတိုင်းမှာ လွပ်လပ်စွာ ရွေးချယ်ပိုင်ခွင့်ရှိသလို လွပ်လပ်စွာ မဲပေးပိုင်ခွင့်၊ မဲမပေးဘဲ နေပိုင်ခွင့်လည်း ရှိရမယ်၊ ၂ဝ၁ဝရွေးကောက်ပွဲဟာ လွပ်လပ်ပြီး တရားမျှတတဲ့ ရွေးကောက်ပွဲတခု ဖြစ်လာမယ်လို့ လုံး ဝမမျှော်လင့်ပါဘူး။
ရွေးကောက်ပွဲ ဥပဒေကစပြီး ထောက်ပြစရာတွေ အများကြီးပါ။ ရွေးကောက်ပွဲကော်မရှင် ဆိုတာလည်း နအဖ စိတ်ကြိုက် ဖွဲ့ထားတာ၊ ဦးသိန်းစိန်နဲ့အတူ ကြံ့ဖွတ်ကနေ ရွေးကောက်ပွဲ ဝင်ကြမယ့် သူတွေကလည်း အစိုးရထိပ်တန်း အရာရှိကြီးတွေ ဖြစ်နေတော့ ကော်မရှင် ကိုယ်တိုင်က ကြံ့ဖွံ သြဇာခံလို ဖြစ်နေတာ၊ အရေးကြီးတာက လူတွေအနေနဲ့ကလည်း ရွေးကောက်ပွဲကို လုံးဝ စိတ်မဝင်စားကြဘူး။
နအဖကလည်း လူတွေကို အသေအချာ အသိပေးရှင်းပြရမှာ ကြောက်နေတယ်၊ ၂ဝဝ၈ ဆန္ဒခံယူပွဲတုန်းကလည်း အများစုက ဖွဲစည်းပုံ အခြေခံဥပဒေဆိုတာ ဘာမှန်းကို မသိလိုက်ကြဘဲ အတင်းအကြပ်အတည်ပြုခဲ့တာ၊ သူတို့ဖွဲ့ထားတဲ့ ကော်မရှင်အဖွဲ့ခွဲတွေ ဆိုတာတောင် ရွေးကောက်ပွဲ ဥပဒေကို သေသေချာချာ သိပုံမရကြဘူး။ ခိုင်းတာလုပ်ရင် ပြီးတာပဲလို့ ထင်နေကြတာ။
၂ဝ၁ဝ ဟာ ပြည်သူ အများ မဲမပေးတဲ့ ရွေးကောက်ပွဲ ဖြစ်ခဲ့ရင် ၂ဝ၁ဝ ကို ကြံ့ဖွံ့က အခွင့်အရေးတွေပေး စည်းရုံးထားသူတွေက လွဲလို့ ကျန်တဲ့ ပြည်သူလူထုက သပိတ်မှောက်နိုင်ခဲ့ရင် နိုင်ငံတကာက ၂ဝ၁ဝ ရွေးကောက်ပွဲကို အသိအမှတ်ပြုဖို့ ခက်သွားမယ်။ အဲဒီလိုလုပ်နိုင်ခဲ့ရင် ထိရောက်တဲ့ ထိုးနှက်မှုဖြစ်တယ်၊ ပြည်သူလူထုကိုလည်း မေတ္တာရပ်ခံချင်ပါတယ်။ အတင်းအကျပ် ဖိအားပေးပြီး မဲထည့်ခိုင်းတာမျိုးကို လက်မခံဘဲ ရဲရဲရင့်ရင့် တွန်းလှန်ကြစေချင်တယ်။ မဲမပေးဘဲ နေခွင့်ရှိတယ်ဆိုတာ ပြည်သူအားလုံး နားလည် လက်ခံထားစေချင်ပါတယ်၊ ဘယ်သူကိုမှ မကြိုက်လို့ ဘယ်သူ့ကိုယ်မှ မဲမပေးတာ ဘာဖြစ်လဲ၊ မဲမပေးဘဲ နေလို့ ဘာဥပဒေနဲ့မှ ဖမ်းလို့မရဘူး၊ အတင်းအကြပ် မဲထည့်ခိုင်းတဲ့သူတွေသာ ဥပဒေကို ချိုးဖောက်သူတွေ ဖြစ်တယ်။ ဘာကိုမှ ကြောက်စရာမလိုဘူးလို့ ပြည်သူလူထုကို အားပေးချင်ပါတယ်။