၂ဝ၁ဝ ခုနှစ်မှာ နအဖက ရွေးကောက်ပွဲ လုပ်မယ်လို့ ကြေညာတာနဲ့ ပတ်သက်ပြီး အမျိုးသား ဒီမိုကရေစီ အဖွဲ့ချုပ် က ဘာတွေ စီစဉ်နေ ပြီလဲ ဆိုတာ ပြည်သူ တွေက သိချင်နေတဲ့ သဘောမျိုး ရှိတယ် လို့ ကြား နေရ ပါတယ်။ ဒါကတော့ သဘောဝ ကျ ပါတယ်။ ဘာကြောင့် လဲ ဆိုတော့ လူထုအများစု က အမျိုးသား ဒီမိုကရေစီအဖွဲ့ချုပ် နိုင်ငံရေးပါတီကို ထောက်ခံပြီး တခဲနက် မဲပေးခဲ့ကြတာလို့ပါဘဲ။
နအဖကလည်း သိပ်ပြီး သိချင်နေမယ်လို့ ယူဆရပါတယ်။ အမှန်တော့ ၁၉၉ဝ ခုနှစ် ရွေးကောက်ပွဲ ပြီးကတည်းက အဓိကသရုပ်ဆောင်ဟာ အမျိုးသားဒီမိုကရေစီအဖွဲ့ချုပ် ဖြစ်လာရမှာ ဖြစ်ပေမယ့် နဝတ-နအဖ စစ်အစိုးရက အတင်းနေရာယူပြီး မင်းသားကြီး တက်လုပ်နေတော့ ပြဿနာတွေ တက်ပြီးရင်းတက်နေတာ နောက်ဆုံးမရှင်းနိုင်ပဲ ဖြစ်နေရာက လက်သည်တရားခံ လိုက်ရှာနေရတဲ့ အခြေအနေကို ဆိုက်ရောက်နေလို့ ဖြစ်ပါတယ်။
နအဖလိုပဲ တရုတ်၊ အိန္ဒိယနဲ့ အာဆီယံ ကျန်အဖွဲ့ဝင် နိုင်ငံတွေကလည်း သိချင်နေပါလိမ့်မယ်။ အဲဒီ နိုင်ငံတွေကတော့ မြန်မာစစ်အစိုးရနဲ့ပေါင်းပြီး လူသားချင်းစာနာထောက်ထားမှုကင်းမဲ့တဲ့ ဒေသတွင်းမှာ အကျိုးစီးပွားတွေ ဖြစ်ထွန်းကုန်တော့ ဆက်ပြီး ဖြစ်နိုင်ဖို့ မျှော်လင့်နေတာကြောင့် ဖြစ်ပါတယ်။
ကုလသမဂ္ဂကလည်း အမျိုးသားဒီမိုကရေစီအဖွဲ့ချုပ်ရဲ့ အသစ်ပြောင်းလဲလာမယ့် သဘောထားကို သိချင်နေတာကတော့ သေချာပါတယ်။ မြန်မာ့ပြဿနာဟာ အဓိကအားဖြင့် နိုင်ငံရေးကြောင့် ဖြစ်နေရပြီး ဒါကိုဖြေရှင်းဖို့ ကုလသမဂ္ဂမှာ တာဝန်အရှိဆုံး ဖြစ်နေပါတယ်။
No comments:
Post a Comment